INEC ta saka sunan Pantami a jerin ƴan takarar gwamnan Gombe na PDP

Hukumar Zaɓe Mai Zaman Kanta ta Ƙasa (INEC) ta wallafa jerin sunayen ƴan takarar zaɓen 2027 na ƙarshe, inda ta saka sunan Farfesa Isa Ali Pantami a matsayin ɗan takarar gwamnan Jihar Gombe a ƙarƙashin jam'iyyar PDP.

Tun bayan fitar da jerin sunayen farko da hukumar ta yi, rashin ganin sunan Pantami da na Aminu Abdussalam Gwarzo, ɗan takarar gwamna na jam'iyyar NDC a Kano, ya janyo ce-ce-ku-ce, lamarin da ya sa wasu suka miƙa ƙorafe-ƙorafe ga hukumar.

A wancan lokaci, INEC ta bayyana cewa za ta duba ƙorafe-ƙorafen da aka gabatar mata domin tantance sahihancin bayanan ƴan takarar.

A cikin makon nan ne wasu kafafen yaɗa labarai a Najeriya suka ruwaito cewa hukumar ta kammala nazarin ƙorafe-ƙorafen, inda wasu majiyoyi suka ce an mayar da sunayen ƴan takarar PDP a Gombe da NDC a Kano.

Sai dai wasu rahotannin sun nuna cewa Pantami kaɗai aka mayar da sunansa cikin jerin ƴan takarar.

A sabon jerin da INEC ta wallafa, an ga sunan Pantami a matsayin ɗan takarar gwamnan Gombe na PDP.

Sai dai dangane da takarar Aminu Abdussalam Gwarzo na jam'iyyar NDC a Kano, hukumar ta saka sunan jam'iyyar NDC a jerin, amma ta yi nuni da cewa akwai hukuncin kotu da ya shafi takarar.

Wannan na nuna cewa har yanzu batun takarar ɗan takarar NDC a Kano yana da alaƙa da shari'ar da ke gaban kotu, kuma akwai buƙatar jiran ƙarin bayani kan matsayin ƙarshe na hukumar.