Atiku Ya Jinjinawa Hukuncin Kotun Ɗaukaka Ƙara Kan Rajistar ADC

Ɗan takarar shugaban ƙasa na jam’iyyar ADC a zaɓen 2027, Atiku Abubakar, ya bayyana gamsuwarsa da hukuncin Kotun Ɗaukaka Ƙara na dakatar da aiwatar da hukuncin Babbar Kotun Tarayya da ya nemi soke rajistar jam’iyyar ADC da wasu jam’iyyu huɗu.

A cikin wata sanarwa, Atiku ya ce matakin da Hukumar Zaɓe Mai Zaman Kanta ta Ƙasa (INEC) ta ɗauka na neman dakatar da aiwatar da hukuncin yana da matuƙar muhimmanci ga tsarin dimokuraɗiyya da bin doka a ƙasar.

Tsohon mataimakin shugaban ƙasar ya bayyana cewa wannan mataki ya nuna muhimmancin kare tsarin shari’a da kuma tabbatar da adalci ga dukkan ɓangarori kafin yanke hukunci na ƙarshe.

Ya kuma jaddada cewa ya kamata ɓangaren shari’a ya ci gaba da kare kundin tsarin mulkin ƙasa tare da tabbatar da bin doka da oda a kowane lokaci.

Atiku ya bayyana fatan cewa za a ci gaba da gudanar da shari’ar cikin gaskiya da adalci domin ƙarfafa tsarin dimokuraɗiyyar Najeriya.