Binciken da kamfanin ƙididdiga na ƙwallon ƙafa, Opta, ya gudanar ya nuna cewa Manchester United ce za ta fara kakar Premier League ta 2026/27 da jadawalin wasanni mafi sauƙi idan aka kwatanta da sauran ƙungiyoyi.

Rahoton ya nuna cewa United ce ke da mafi sauƙin wasanni biyar na farko a gasar, duk da cewa za ta kara da abokiyar hamayyarta ta birni, Manchester City, a cikin wannan lokaci.

Sabuwar kakar za ta kuma kasance muhimmiyar dama ga Michael Carrick, wanda zai fara kakarsa ta farko a matsayin cikakken kocin Manchester United.

Opta ta kuma bayyana cewa Liverpool da Newcastle United suna cikin ƙungiyoyin da ke da jadawalin farko mai sauƙi, inda aka sanya su a matsayi na 18 da 19 a jerin wahalar jadawalin wasanni.

A gefe guda kuma, Arsenal da Manchester City suna tsakiyar jadawalin wahalar wasanni, inda aka sanya su a matsayi na 13 da 14 bi da bi.

Sai dai rahoton ya nuna cewa Bournemouth ce za ta fuskanci mafi tsaurin jadawalin wasanni a farkon kakar wasa, musamman bayan rabuwarta da tsohon koci, Andoni Iraola.

A cikin wasanni biyar na farko, Bournemouth za ta kara da:

  • Manchester City
  • Everton
  • Newcastle United
  • Brentford
  • Liverpool

Masana na ganin cewa jadawalin farko kan taka muhimmiyar rawa wajen yadda ƙungiyoyi ke fara kakar wasa, musamman ga waɗanda ke da sababbin kociyoyi ko sababbin 'yan wasa.