Gwamnan Kano Injiniya Abba Kabir Yusuf, ya gargadi mutane kan tsallaka danja kafin ba da hannu

Gwamnan Jihar Kano, Engr. Abba Kabir Yusuf, ya gargadi al'umma kan tsallaka danja kafin ba da hannu, tare da jaddada muhimmancin bin dokokin zirga-zirga.

Daraktan Yaɗa Labaran Gwamnan Kano, Sunusi Bature Dawakin Tofa, ne ya bayyana haka ta cikin wata sanarwa da ya fitar a yau talata.

Sanarwar ta bayyana cewa gwamnan ya yi wannan gargaɗi ne yayin da ya shafe sama da awa ɗaya a mahadar Kofar Fanfo yana sa ido kan yadda masu ababen hawa kan bin danja.

Sanarwar ta ƙara da cewa gwamnan ya buƙaci direbobi, masu Adaidaita Sahu da masu tafiya a ƙafa su bi dokokin zirga-zirga domin kare rayuka da dukiyoyi.

Haka kuma ya bayyana cewa gwamnatinsa za ta sake fasalin Hukumar KAROTA domin ƙarfafa kula da zirga-zirga da tabbatar da bin dokokin hanya a faɗin jihar.